काठमाडौं । ‘डाँडाँघरे साइली’ बोलको गीत ब्लकबस्टर हिट भएपछि यही टिमले नयाँ गीत ‘निरमाया ठूली’ सार्वजनिक गरेको छ । स्वरुपराज आचार्य र लक्ष्मी मल्लको स्वरमा तयार भएको यो गीतमा कृष्ण केसीको शब्द, श्रीकृष्णबम मल्लको संगीत छ ।
मौसम हिमालीको कोरियोग्राफी रहेको यो गीतको भिडियोमा प्रकाश सपुत, शिल्पा पोखरेल र करिश्मा ढकालको अभिनय हेर्न सकिन्छ । यो गीतलाई पनि यसका मेकरले ‘डाँडाघरे साइली’ जस्तै दर्शकको मन छुने तरिकाले बनाएको छ ।
नवराज उप्रेतीको छायांकन रहेको भिडियोमा प्रविण भट्टको सम्पादन छ । आफ्नो मन युट्युब च्यानलबाट यो भिडियो सार्वजनिक गरिएको हो ।
