काठमाडौं । गुरुङ फिल्ममा अभिनय गरिरहेकी नायिका कृष्टिना गुरुङ यही साउन ११ गतेबाट रिलिज हुने फिल्म ‘ईश्वर’मा नायिकाकै रुपमा दर्शकमाझ आउँदैछिन् । यसअघि फिल्म ‘दयारानी’मा छोटो भूमिकामा अभिनय गरेकी उनी ‘ईश्वर’मा भने प्रमुख भूमिकामा नै छिन् ।
कृष्टिनाका अनुसार फिल्मका निर्माता ध्रुव थापा र माओत्से गुरुङका कारण उनी यो फिल्ममा जोडिएकी रहिछन् । ‘उहाँहरु यो फिल्मका लागि मंगोलियन अनुहारको नायिका खोजिरहनुभएको रहेछ । उहाँहरुसँग भेट भएपछि ईश्वरमा जोडिएँ’, कृष्टिना भन्छिन् ।
गुरुङ फिल्ममा ग्रामीण चरित्र निर्वाह गरेकी कृष्टिनाले ‘ईश्वर’ मा पनि त्यही चरित्रलाई निरन्तरता दिएकी छन् । ‘फिल्ममा मेरो चरित्रको नाम मिनु हुन्छ । म विद्यालयकी शिक्षिका छु । म आफ्नो चरित्रबाट सन्तुष्ट छु’, कृष्टिना भन्छिन् ।
फिल्मको ट्रेलरमा कृष्टिनासँग फिल्मका नायक ध्रुव थापा र कलाकार बुद्धि तामाङको प्रेम देखाइएको छ । ‘फिल्ममा बुद्धि दाई मेरो फुपुको छोरा र म चाहिँ बुद्धि दाईको मामाको छोरी छु । नाताले हामी सोल्टी सोल्टिनी । हाम्रो संस्कृतिमा सोल्टी सोल्टिनीको हक लाग्ने भएकाले पनि हामीलाई एकअर्का प्रति नजिकिएको देखाइएको छ’, उनी भन्छिन् ।
कृष्टिनाको अनुभवमा उनलाई मिनु चरित्र निभाउन केही चुनौती पनि अनुभव भएको रहेछ । ‘म सानो क्यारेक्टरबाट नेपाली फिल्ममा आएकी हुँ । सुरुदेखि नै ठूलो क्यारेक्टरबाट आएको भए त्यो च्यालेन्ज हुँदैन थियो होला । तर ईश्वरमा केही च्यालेन्ज चाहिँ भयो’, कृष्टिनाको बुझाई छ ।
कृष्टिनाले सिरिज ‘क्राइम फाइल’मा मात्र आधुनिक गेटअपमा अभिनय गरेकी रहिछन् । ‘मलाई गाउँले जनराकै फिल्म मनपर्छ । त्यहीकारण अहिलेसम्म ग्रामीण किसिमकै चरित्र निभाइरहेकी छु । किनभने त्यही रहनसहनमा हुर्केकी छु । मलाई आधुनिक क्यारेक्टरमा फिट हुँदैन कि जस्तो लाग्छ’, उनी भन्छिन् ।
गुरुङ भाषाका फिल्मबाट नेपाली फिल्ममा आफूले पाइला टेकेकाले आफ्नो कामलाई दर्शकले मनपराइदिनेमा उनी ढुक्क छिन् । ‘म ईश्वरबाट आशावादी छु । अहिले ईश्वरमा नै ध्यान दिइरहेको छु । अरु फिल्मको लागि कुरा गरेकी छैन् । ईश्वरबाट कस्तो प्रतिक्रिया आउँछ, त्यसपछि अरु फिल्म गर्ने या नगर्ने भन्ने टुंगो लाग्छ’, उनी भन्छिन् । फिल्म ‘ईश्वर’मा राजु गिरीको निर्देशन छ ।
