काठमाडौं । फिल्म ‘वरिष्ठ बलराम’को मुहूर्त गरिएको छ । बुधवार टाइटल टिजर सार्वजनिक गर्दै रिलिज डेट घोषणा गरेको फिल्मको आइतबार मुहूर्त गरिएको हो ।
निर्माणपक्षले आज काठमाडौंको बुढानीलकण्ठ मन्दिरमा पूजा गर्दै छायांकन सुरु भएको छ । लक्ष्मी पूजाका दिन कात्तिक ३ गते रिलिज हुने फिल्ममा सुरेन्द्र पौडेलको निर्देशन रहनेछ । फिल्ममा दयाहाङ राई, विजय बराल, समृद्धि अर्याल, गौमाया गुरुङ, पशुपति राई, माओत्से गुरुङ, प्रदीप चौधरी, रामबाबु रेग्मीलगायतका कलाकारको अभिनय रहनेछ ।
आशिष एच तामाङ र श्रीराज कार्की निर्माताका रूपमा रहेका छन् । निर्देशक पौडेलकै कथा र सम्पादन रहने फिल्ममा महेश दवाडीको लेखन छ ।
सामाजिक कथावस्तुमा आधारित फिल्मको छायांकन चितवन र हेटौडाका विभिन्न स्थानमा गरिनेछ । फिल्ममा मानकृष्ण महर्जनको डिओपी, तारानाथ न्यौपानेको मुख्य सहायक निर्देशन, प्रशान्त शिवाकोटीको संगीत, सम्राट बस्नेतको द्वन्द्व र प्रदीप लामाको कोरियोग्राफी रहने छ ।
फिल्म निर्माणमा वृषभ सिद्धी इन्टरटेनमेन्टको प्रस्तुतिमा आन्भी फिल्मस्को सहकार्यमा हुनेछ । फिल्माई काठमाडौं उपत्यकामा डिसिएन र उपत्यकाबाहिर कुवेर सिने डिस्ट्रीव्युसनले वितरण गर्ने भएका छन् ।
