काठमाडौं । गाउँघरमा अहिले पनि ‘साली कसको ?’ भनेर सोध्यो भने उत्तर ‘भेना’को भन्ने आउँछ । यही सन्दर्भलाई जोडेर चितवनका पुराना निर्माता प्रसाद श्रेष्ठले निर्माण गरेको फिल्म ‘साली कस्को भेनाको’को ट्रेलर सार्वजनिक भएको छ । कमेडी फ्लेबरमा निर्माण गरिएको ट्रेलर हाँस्य कलाकार विल्सनविक्रम राईको वरीपरी घुमेको छ । गाउँमा भेनाको रुपमा चिनिने विल्सनलाई उनकी सालीका रुपमा चिनाइएको रजनी गुरुङसँगको सम्बन्धलाई देखाइएको छ ।
ट्रेलरको एक दृश्यमा रजनीले बाख्राले बोका खोजेपछि विल्सनलाई बोका खोज्न आग्रह गर्दा विल्सन रिसाएको दृश्य रोचक छ । भद्र भुजेलले निर्देशन गरेको फिल्ममा विल्सनविक्रम राई, सुष्मा कार्की, रवि गिरी, मरिष्का पोखरेल, रजनी गुरुङ, प्रिया रिजाल, जयनन्द लामा, कविता आले, पुस्कर गुरुङ, वीरेन श्रेष्ठ, देव सागरलगायतका कलाकारको अभिनय छ ।
भदौ २९ गते रिलिज हुने फिल्ममा पुष्प आचार्यको कथा, सुरज शाही ठकुरी र मिन घलानको संगीत, दिर्घ गुरुङको छायांकन, बसन्त श्रेष्ठ, गम्भीर बिष्ट र सुमित लामाको नृत्य छ । फिल्ममा सुनिलकुमार न्यात्स्यो, बिशाल श्रेष्ठ, उमेश अधिकारी र मुक्ति अधिकारीको पनि लगानी छ । प्रसाद श्रेष्ठले यस अघि ‘कर्जा’, ‘कान्छी’, ‘सन्तान’ जःता फिल्म निर्माण गरिसकेका छन् ।
