काठमाडौं । फिल्म ‘प्रेमगीत’बाट उदाएका युवा स्टार प्रदिप खड्का आगामी भदौ २२ गतेदेखि फिल्म ‘रोजी’मार्फत दर्शकमाझ आउँदैछन् । प्रेमकथाका फिल्ममा रुचाइएका प्रदिपका लागि फिल्म ‘रोजी’ फरक जनराको फिल्म हो । अर्थात उनी पहिलोपटक थ्रिलर फिल्ममा देखिँदैछन् । ‘स्क्रिप्ट र पात्रको सशक्तताले फिल्मप्रति निकै आशावादी छु’ आइतबार पत्रकारमाझ उनले भने,‘पहिलोपटक थ्रीलर फिल्म गर्दैछु । मेरो लागि यो अलग जनरा हो । दर्शकले मभित्र भिन्न स्वाद प्राप्त गर्नुहुनेछ ।’
फिल्मकी नायिका मिरुना मगर र परमिता राणाले प्रदिपसँग काम गर्दा नयाँ अनुभव लिएको बताइन् । निर्देशक नीरक पौडेलले आफूले रोजीमार्फत दर्शकलाई न्याय गर्ने बताए । ‘मैले दर्शकलाई फिल्ममा न्याय गर्छु र निराश तुल्याउँदिन’ पौडेलले भने ।
संगीतकार एलिस कार्कीले फूल हैन…गीतले सफलता प्राप्त गरेको बताए । ‘म्युजिकल्ली कन्टेस्टमा सयौं सहभागि हुँदैछन् । इन्टरनेटमा समेत यसले राम्रो भ्यूअर्ज प्राप्त गरेको छ’ पाश्र्वध्वनी डिजाइनर समेत रहेका कार्कीले भने, ‘फूल हैन गीत हाम्रा लागि पब्लिसिटीको बलियो माध्यम पनि हो ।’
गायक प्रताप दास र गायिका प्रविशा अधिकारीले फूल हैन गीतको सफलता र आफ्नो अनुभवमाथि प्रकाश पारे । नेपाल आइडल फेम्ड गायक दासले गीतमा अधिकारीसँग टीमअप गरेका छन् । गोपिकृष्ण मूभिज र आरोही इन्टरटेनमेन्टको ब्यानरमा निर्माण भएको फिल्म टर्की र नेपालमा छायांकन भएको हो ।
