काठमाडौं । स्टेण्डअप कमेडियनका रुपमा परिचित कलाकार सन्दिप क्षेत्री पछिल्लो समयमा फिल्ममा पनि व्यस्त छन् । आगामी कार्तिक १६ गतेबाट प्रदर्शन हुन लागेको फिल्म ‘चंगा चेट’मा सन्दिप अल्छे विद्यार्थीको चरित्रमा छन् । फिल्ममा उनको अपोजिटमा नायिका परमिता राज्यलक्ष्मी राणा छिन् ।
फिल्मको आइतबार राजधानीमा सार्वजनिक ट्रेलरमा सन्दिपले परमितालाई क्लियर हान्ने कुरा गरिरहेका छन् । तर उनले के कुराको क्लियर हान्छन् त्यो थाहा पाउन दर्शकले फिल्म नै हेर्नुपर्ने हुन्छ ।
ट्रेलरमा पैसा कमाउन आयुष्मान देशराज जोशी, सन्दिप क्षेत्री र रबिन्द्र झाले गर्ने संघर्ष र उनीहरुले अपनाउने रणनीतिलाई देखाइएको छ । दीपेन्द्र के खनालको निर्देशन रहेको फिल्ममा माधव वाग्ले र शर्मिला पाण्डेको निर्माण छ ।
