काठमाडौं । आगामी मंसीर २८ मा रिलिज हुने फिल्म ‘सुश्री सम्पति’ को दोस्रो गीत ‘झुम्की हराए’ सार्वजनिक भएको छ । सार्वजनिक गीतमा नायिका प्रियंका कार्कीको आइटम नृत्य रहेको छ । गीतमा सलोन बस्नेत, विनोद न्यौपाने र प्रमोद अग्रहरी पनि फिचर्ड छन् । गीतमा शब्द र संगीत सुरेश अधिकारीको रहेको छ भने यसलाई मिना निरौला र राजन इशानले स्वर दिएका छन् । गीतमा कविराज गहतराजको कोरियोग्राफी छ ।
चलचित्र पत्रकार सुव्रत आचार्यको निर्देशन रहेको फिल्ममा सलोन बस्नेत, सारा सिर्पाली र विनोद न्यौपाने मुख्य भूमिकामा छन् । रमेश त्वायना प्रस्तुतकर्ता रहेको फिल्मको कथा निर्देशक सुव्रत आफैले लेखेका हुन् । फिल्मको निर्मातामा विज्ञान राई, नुनम सुब्बा र रमन सिलाकार रहेका छन् ।
फिल्ममा प्रमोद अग्रहरी, राजाराम पौडेल, विशारद बस्नेत, सुनिता श्रेष्ठ ठकुरी लगायतका कलाकारहरुको पनि अभिनय रहेको छ भने यसमा प्रियंका कार्की पनि अतिथि भूमिकामा देखिनेछिन् ।
अभिमन्यू निरवी र निर्देशक आचार्यको डाइलग रहेको फिल्मको स्क्रिनप्ले अभिमन्यूकै रहेको छ । फिल्मलाई उपत्यकामा बिके फिल्मसका गोपालकाजी कायस्थ र मोफसलमा एफडी कम्पनीले वितरण गर्नेछ । फिल्मलाई भरत रेग्मीले सम्पादन गरिरहेका छन् ।
