काठमाडौं । फिल्म ‘चौका दाउ’को फस्ट लुकका रूपमा तीन पोष्टर सार्वजनिक भएको छ । आइतबार सार्वजनिक तीन पोष्टरमा फिल्मका प्रमुख कलाकारहरू फिचर्ड छन् । फिल्म आगामी पुस २७ गते रिलिज हुँदैछ ।
मनोज राजभण्डारी र सौर्यजीत बासकोटाले निर्माण गरेको फिल्ममा पूर्णेन्दु झाको निर्देशन छ । तीनमध्ये एक पोष्टरमा फिल्ममा जुवाडे चरित्रमा देखिाएका रविन्द्र झा, विल्सनविक्रम राई, तैयब शाह र सन्तोष पन्त जुवा हारेपछि नांगै गाडीमा घर फर्किएको देखाईएको छ । जसमा कलाकार सोनिका केसीलाई मदिराको सुराहीसहित प्रस्तुत गरिएको छ ।
अर्को पोष्टरमा रविन्द्रलाई मधेसी, सन्तोषलाई शिख, तैयवलाई मुस्लिम र विल्सनलाई हिमाली पहिरनमा देखाइएको छ । यही पोष्टरमा यी चारजना कलाकारको बीचमा नायिका वर्षा राउतलाई राखिएको छ । पोस्टरमा नायक अजश्र ढुंगाना, निर्मल शर्मा, योगी विकाशानन्द, शिवशंकर रिजाल (जोगिन्दर पानवाला)लाई पनि समेटिएको छ ।
फिल्मका परिकल्पनाकार संगीतकार शम्भुजीत बासकोटा हुन् । उनले चार दशक बढी समयदेखि नेपाली फिल्म र संगीतमा पु¥याएको योगदानलाई निरन्तरता दिन फिल्म निर्माण गरेको बताए । फिल्ममा शम्भुजीतकै कथा, संगीत र गायन छ ।
फिल्ममा वर्षा राउत, रविन्द्र झा, अजश्र ढुंगाना, सन्तोष पन्त, तैयव शाह, विल्सनविक्रम राई, निर्मल शर्मा, सोनिका केसी, सुनिता श्रेष्ठ ठाकुर, रोशनी सापकोटा, श्याम राई, रमेश अधिकारीलगायतको अभिनय छ ।
अभिमन्यु निरवीको पटकथा र संवाद रहेको फिल्ममा दीर्घ गुरुङको छायांकन, मित्रदेव गुरुङको सम्पादन, रोशन श्रेष्ठको द्वन्द्व, बसन्त श्रेष्ठ र भिमफेदी गाईजको कोरियोग्राफी छ । फिल्म सौर्य प्रोडक्सनको व्यानरमा निर्माण भएको हो ।
