काठमाडौं । जातीय विभेदको प्रेममा आधारित गीत ‘तिमी सुनमा जोखिने मान्छे’ को भिडियो छायांकन गरिएको छ । चलचित्र पत्रकार शान्तिप्रियले भिडियोको निर्देशन गरेको भिडियोमा केटा र केटीबिचको बालापन आत्मीयता एवं वयस्कमा झाँगिएको प्रेमलाई चित्रण गरिएको छ ।
गीतकार प्रकाश के.सी.को शब्द रहेको गीतमा शरद समिपको स्वर छ । चित्रकार एवं संगीतकार ज्योति प्रकाश बिकले संगीत दिएको गीतमा विष्णु अधिकारीको संगीत संयोजन छ । गीतमा अभिनेत्री शिल्पा पोखरेल, चलचित्रकर्मी लेखक तथा निर्देशक मोहन निरौला, स्वयं गायक शरद समिपले गीतमा अभिनय गरेका छन् । यस्तै बाल कलाकार कुशाग्र भट्टराई एवं एञ्जेल राई पनि गीतको अभिनयमा छन् भने निर्देशक माधवराज खरेल समेत भिडियोमा देख्न सकिन्छ ।
भिडियोलाई मुकेश हुमागाइले छायांकन गरेका छन् भने ड्रोन अपरेटिङ रविन बजगाईले गरेका छन् । राम ढकालको स्टिल फोटोग्राफी एवं कविता तोलाङ्गीको श्रृंगार गीतमा रहेको छ । गीतमा एसोसिएट निर्देशकका रुपमा माधबराज खरेल रहेका छन् ।
गीतको भावलाई आफूले सकेसम्म उतारेको निर्देशक शान्तिप्रियले बताए । चरित्र उतार्नकै लागि गीतमा धेरै कलाकार राख्नु परेको समेत प्रियले बताएका छन् । गीत दुई सातापछि रिलिज गरिने बताइएको छ ।
