मुम्बई(एजेन्सी) । बलिउडका बादशाह शाहरुख खान केही समयका लागि फिल्मबाट ब्रेक लिएको सर्वविदितै छ । उनी हालका दिनमा परिवारसँग उर्जाशिल समय बिताइरहेका छन् । हालै मात्र शाहरुखको परिवार र उनको बालबच्चको केही तस्बिर सार्वजनिक भएको थिए । उनी छोरी सुहानाको कलेज ग्राजुएसनमा सहभागी थिए ।
शाहरुख पछिल्लो पटक आनन्द एल रायको फिल्म ‘जिरो’मा देखिएका थिए । तर यो फिल्म बक्सअफिसमा असफल रह्यो । जसकारण शाहरुख आफ्नो अर्को नयाँ फिल्मको छनोंटका लागि कुनै हतारोमा देखिएनन् । उनले नयाँ फिल्मका लागि केही स्क्रिप्ट पनि पढे । तर अब सुन्नमा आएको छ कि उनी फिल्म निर्देशक राजकुमार हिरानीको आइडियामा काम गरिरहेका छन् ।
शाहरुखले राजकुमारले निर्देशन गर्ने नयाँ फिल्मको स्क्रिप्टमा काम गर्न इच्छा देखाएका छन् । शाहरुख उनीसँग काम गर्न निकै उत्साहित छन् । उनले दुई दिन अघि मात्र हिरानीसँग भेटेर फिल्मको बारे छलफल गरेका छन् ।
सन् २००३ मा रिलिज भएको सुपरहिट फिल्म ‘मुन्ना भाइ एमबीबीएस’ मा राजकुमारले शाहरुखलाई लिन चाहेका थिए । तर शाहरुखको व्यस्त तालिकाले गर्दा यो फिल्ममा सञ्जय दत्तले अभिनय गर्ने मौका पाए । यसपछि उनले फिल्म ‘थ्री इडियट्स’ पनि अफर गरे पनि शाहरुखले यो फिल्ममा काम गर्न अनिच्छा देखाएका थिए ।
