काठमाडौं । आगामी साउन ३० गतेबाट प्रदर्शन हुने फिल्म ‘हजार जुनीसम्म’ को ट्रेलर सार्वजनिक भएको छ । राजधानीमा एक कार्यक्रमको आयोजना फिल्मकर्मी तथा पत्रकारमाझ सार्वजनिक गरिएको ट्रेलरमा अभिनेता आर्यन सिग्देललाई दुई गेटअपमा देखाइएको छ । ट्रेलरमा स्वस्तिमा खड्का, सलोन बस्नेत, संचिता लुइँटेल, शिवहरी पौडेल, अखिलेस प्रधान र अनुभव रेग्मी फिचर्ड छन् ।
‘नाइँ नभन्नु ल’ सिरिजका निर्देशक विकासराज आचार्यको निर्देशनमा तयार फिल्ममा निर्देशक विकास र सामिप्यराज तिमल्सिनाको पटकथा र संवाद छ । ‘हामीले स्टारडमको आधारमा भन्दा पनि कथानुसार फिल्मको लागि कास्ट गरेका छौं । फिल्म पूर्ण रुपमा पारिवारिक छ र यसले हाम्रै वरपरको कथालाई वाचन गरेको छ’ उनले भने ।
कविता रेग्मी कार्यकारी निर्माता रहेको फिल्ममा कविराज गहतराजको नृत्य, उदयराज सोताङ, राजनराज सिवाकोटी, बसन्त सापकोटा र प्रविन पौडेलको संगीत, अर्जुन जिसीको सम्पादन छ । फिल्मका निर्माता विशाल चाम्लिङ हुन् ।
