काठमाडौं । बक्स अफिसमा सिरिज नै पिच्छे रेकर्ड राखेको फिल्म ‘छक्का पन्जा’ समूहले निर्माण गरेको नयाँ फिल्म ‘छ माया छपक्कै’ को ट्रेलर सार्वजनिक भएको छ । राजनीतिक पृष्ठभूमिमा मौलाएको प्रेम र प्रेमी तथा प्रेमीकाबीचको उमेर अन्तरलाई देखाइएको ट्रेलर कमेडीसँगै सस्पेन्स र राजनीति गन्धमा आधारित छ ।
ट्रेलरको एक दृश्यमा अभिनेता दीपकराज गिरीले प्रहरीको छेउमा ल्याप्चे हान्न लागेको देखाइएको छ । तर के कारणले उनले ल्याप्चे हानेको हुन् भन्ने थाहा पाउन दर्शकले असोज २४ गते नै कुनुपर्नेछ । फिल्ममा दीपकराज राजनीतिकर्मी र केकी उनकी प्रेमिकाको भूमिकामा छन् । जसको परिवार छुट्टाछुट्टै राजनीतिक पृष्ठभूमिका छन् भन्ने ट्रेलरबाट अनुमान लगाउन सकिन्छ ।
निर्देशक दीपेन्द्र लामा निर्देशित फिल्ममा दीपकराज गिरी, केकी अधिकारी केदार घिमिरे, जितु नेपाल, सुपुष्पा भट्ट, अनुराग कुँवर, प्रकाश घिमिरे, रमा थपलिया, विष्णु सापकोटालगायतका कलाकारहरुको अभिनय छ ।
दीपाश्री निरौला निर्देशन सल्लाहकार रहेको फिल्ममा हरि हुमागाइँको छायांकन, विपिन मल्लको सम्पादन, केदारप्रसाद घिमिरे र जितु नेपालको कार्यकारी निर्माण, निर्देशक लामाको कथा, दीपकराजको पटकथा, रोशन श्रेष्ठको द्वन्द्व र कविराज गहतराजको कोरियोग्राफी छ । फिल्मका निर्माता रोहित अधिकारी हुन् ।
