काठमाडौ । रेखा थापा र सबिन श्रेष्ठ स्टारर फिल्म ‘हिरो रिटर्न्स’ले फिल्म सेन्सर बोर्डबाट ‘पीजि’ सर्टिफिकेट पाएको छ । तीन दिन अघि गरिएको सेन्सरमा फिल्मले ‘पीजि’ सर्टिफिकेट पाएको हो । यो सर्टिफिकेट पाए पछि यो फिल्मलाई १६ वर्ष मुनिका दर्शकहरुले अभिभावकको निगरानीमा हेर्नुपर्ने हुन्छ ।
आशिष भेटवालले निर्देशन गरेको फिल्ममा दिल श्रेष्ठ, सरोज खनाल, सुलेमान शंकर इकु, रोशन श्रेष्ठ, डिबी बम्जम, सुशान्त श्रेष्ठ, किरण श्रेष्ठ लगायतको पनि अभिनय रहेको छ । कमेडी एक्सन जनराको फिल्ममा शिवम अधिकारीको कथा, मदनकश्यप घिमिरेको छायांकन, दीपक शर्मा र टंक बुढाथोकीको संगीत, कविराज गहतराजको कोरियोग्राफी, चन्द्र पन्तको एक्सन र मित्र डि गुरुङको सम्पादन रहेको छ । ध्रुवतारा फिल्मस र सोम ओम फिल्मसको संयुक्त व्यानरमा निर्माण भएको फिल्ममा भिम न्यौपाने र धुव्र न्यौपाने निर्माता छन् ।
निर्माण पक्षले लकडाउनका कारण हलमा फिल्म चलाउने वातावरण नभएपछि यही जेठ ३० गतेबाट डिस होममा फिल्म रिलिज गर्दैछ । फिल्म वैशाखको अन्तिममा रिलिजको तयारीमा थियो । निर्माता तथा कलाकार ध्रुव न्यौपानेले अहिले डिस होममा फिल्म रिलिज गरे पनि कोरोना महामारीका कारण लागु भएको लडकाउन खुलेपछि हलमा प्रदर्शन गरिने बताए ।
