मुम्बई(एजेन्सी) । बलिउड अभिनेता शाहिद कपुरको करियर अहिले उत्कृष्ट फर्ममा छ । फिल्म ‘कबीर सिंह’ हिट भएपछि उनले कैयौं ठूला फिल्मबाट अफर पाइरहेका छन् । उनलाई हरेक ठूला निर्देशक आफ्नो फिल्ममा अभिनय गराउन चाहन्छन् । यही माहौलमा कबिरले आफ्नो पारिश्रमिक पनि बढाएका छन् ।
समाचार अनुसार शाहिद चाँडै नै ओटीटी डेब्यू गर्दैछन् । उनी डिजिटल प्लेटफर्ममा आफ्नो भाग्य चम्काउन तयार छन् । शाहिदले ओटीटी प्लेयर नेटफ्लिक्ससँग सय करोडको विशेष सम्झौता गरेका छन् । यो सम्झौता अनुसार उनी कैयौं फिल्म र सिरिजमा देखिनेछन् । हालसम्म यो विषयमा शाहिदले कुनै जानकारी दिएका छैनन् । तर नेटफ्लिक्स सम्बद्ध स्रोतका अनुसार यो सम्झौता फाइनल भइसकेको छ । यदी यो सत्य हो भने यसले शाहिदसँगै नेटफ्लिक्सलाई पनि फाइदा दिलाउनेछ । लामो समयदेखि नेटफ्लिक्स एक हिट फिल्म या सिरिजको पखाईमा छ ।
कोरोना कालमा कैयौं सेलिब्रेटीले ओटीटीमा पाइला चाले । अमिताभ बच्चनदेखि लिएर कैयौं स्टारले आफ्नो फिल्मलाई ओटीटीमा रिलिज गरिसकेका छन् । कामको कुरा गर्दा यतिबेला शाहिद आफ्नो फिल्म ‘जर्सी’को तयारी गरिरहेका छन् । फिल्ममा उनी क्रिकेटरको भूमिकामा छन् ।
