मुम्बई(एजेन्सी) । भारतको हरियाणा राज्यकी नर्तकी, गायिका र अभिनेत्री सपना चौधरी चिनाइहनु पर्ने नाम होइन । उनले आफ्नो मेहनतबाट आज जुन सफलता पाएकी छन्, त्यो आफैंमा तारिफयोग्य छ । उनको नृत्य शो हेर्न लाखौंको भीड लाग्ने गरेको छ । उनी सामाजिक सन्जालमा पनि उत्तिकै छाइरहन्छिन् ।
सपनाले हालैमात्र छोरालाई जन्म दिएकी छन् । उनको मोडल तथा अभिनेता वीर साहूसँग गुपचुप तरिकाले सन् २०२० को जनवरीमा कानूनी विवाह भएको थियो । आज सुपरस्टारको जिन्दगी बाँचिरहेकी सपनालाई कुनै बेला पिताको औषधि किन्नकै लागि घर बन्धकीमा राख्नुपरेको थियो । उनी ३१ सय रुपैंयाँमा डान्स शो गर्थिन् । यही नृत्य शैलीले आज उनी बिलासी जीवन बिताइरहेकी छन् ।
सपनाको जन्म सन् १९९० सेप्टेम्बर २५ मा हरियाणाको रोहतकमा भएको हो । हरियाणाको गाउँबाट शुरु भएको उनको नृत्य यात्रा बिग बोस हुँदै र बलिउडसम्म पुगेको छ । उनी एक स्टेज शोबाट करिब २ देखि ३ लाख पारिश्रमिक लिन्छिन् । यो हिसाबले उनी महिनामा २२ देखि २५ वटा कार्यक्रमसम्म भ्याउछिन् । यद्यपि उनको यो पारिश्रमिकको पुष्टि नभएपनि सबैले गरेको अनुमान हो ।
सपना नयाँदिल्लीस्थित नजफगढमा रहेको करोडौंको घरमा बस्छिन् । उनीसँग ओडी र फर्चयनर जस्ता बिलासी गाडी छन् । उनी आफ्नो सुरक्षाका लागि एक बाउन्सरलाई पनि सँगै राख्छिन् । सञ्चारमाध्यममा आएका समाचारलाई मान्ने हो भने सपनासँग झन्डै १५ करोड बराबरको सम्पत्ति छ ।
