काठमाडौं । पछिल्लो समय नेपालमा रियालिटी शोको क्रेज बढिरहेको छ । रियालिटी शोमा दर्शकको आकर्षण बढिरहेको समयमा टेलिभिजनहरुले पनि नयाँ रियालिटी शोको उत्पादन गरिरहेका छन् ।
यस्तैमा इमेज टिभी एचडीबाट नयाँ रियालिटी शो प्रशारणमा आउने भएको छ । भ्वाइस स्टार नेपालले निर्माण गर्ने ‘नेपाल्स सिङ्गिङ सुपरस्टार’ इमेजबाट प्रशारण हुन लागेको हो । सोमबार इमेज टिभी एचडी र भ्वाइस स्टार नेपालबीच सम्झौता भएको छ ।
इमेज एचडीका तर्फबाट कार्यकारी अधिकृत महेन्द्र विष्ट र नायब महाप्रवन्धक सुरेश शर्मा तथा भ्वाइस स्टार नेपालका तर्फबाट क्रियटिभ डाइरेक्टर रवी श्रेष्ठ र सुरज जोशीले सम्झौतामा हस्ताक्षर गरेका थिए ।
‘नेपाल्स सिङ्गिङ सुपरस्टार’मा सांगीतिक क्षेत्रमा संघर्षरत गायकगायिका तथा दुरदराजमा रहेका प्रतिभालाई स्थान दिइने निर्देशक रवि श्रेष्ठ बताए ।
रविका अनुसार शोका लागि पहिलो चरणमा डिजिटल अडिसनबाट प्रतिष्पर्धीहरुको छनोट गरिनेछ । डिजिटल अडिसन पुषको पहिलो साताबाट खुल्ला हुनेछ । डिजिटल अडिसनबाट छानिएका प्रतिभालाई फिजिकल अडिसनमा सामेल गराइनेछ ।
२५ श्रृंखलासम्म चल्ने प्रतिष्पर्धामा विजयी हुने प्रतियोगीले २५ लाख नगद पाउनेछन् । विजेतको घोषणा दर्शकले दिएको भोटका आधारमा नै हुनेछ । भोटका लागि सजिलो पे भोटिङ पार्टनर बनेको छ ।
शोको निर्णायकहरु पक्का भइसकेका छन् । तर, प्रचारको लागि ‘गेस द जजेज’ क्याम्पिन हुनेछ । उक्त क्याम्पेनमा विजयी हुनेले उचित पुरस्कार पाउनेछन् ।
