काठमाडौं । आगामी भदौ ८ मा रिलिज हुने फिल्म ‘नाइ नभन्नू ल ५’को शीर्ष गीत ‘तिम्रो आँखामा आँखा जुधाई’ सार्वजनिक भएको छ । मेलिना राईको स्वर, बसन्त सापकोटाको संगीत र दिनेश थपलियाको शब्द रहेको गीतमा स्वस्तिमा खड्का र अभिषेक नेपालले फिचरिङ गरेका छन् । विकासराज आचार्यको लेखन तथा निर्देशन रहेको फिल्ममा अभिषेकको डेब्यु अभिनय छ ।
इलाम, सिन्धुली बर्दिवास सडक, गोदावरीलगायतका स्थानमा खिचिएको गीतमा स्वस्तिमाले रिसाएका अभिषेकलाई गीतमार्फत फकाउँदै गरेको देख्न सकिन्छ । वान टाइम सिनेमाको व्यानरमा निर्माण गरिएको फिल्ममा दिलिप रायमाझी, निरुता सिंह, प्रियंका कार्की, केकी अधिकारी, अनुभव रेग्मी, सेड्रिना शर्मालगायतको अभिनय छ ।
फिल्ममा पुरुषोत्तम प्रधानको छायांकन, अर्जुन जिसीको सम्पादन, कविराज गहतराजको कोरियोग्राफी, सामिप्यराज तिमिल्सिना र विकासराज आचार्यको लेखन छ । फिल्ममा दिनेश पोखरेल, पुरुषोत्तम प्रधान र विष्णुमणि दाहाल कार्यकारी निर्माता तथा हरिबोल भण्डारी र गौरीराज जोशी निर्माता छन् ।
