काठमाडौं । दशैंलाई लक्षित गर्दै आशिष सचिन र मेलिना राईले ‘पिरिम नलाउने’ घोषणा गरेका छन् । उनीहरुले यो घोषणा गीत ‘पिरिम नलाउने’मा गरेका हुन् । गीतमा दीपक शर्माको संगीत छ । पछिल्लो समय फिल्म ‘छक्का पञ्जा ३’ मा समावेश गीत ‘पहिलो नम्बरमा’मार्फत चर्चामा रहेका दीपकले यसगीतलाई पनि फिल्मी शैलीमा कम्पोज गरेका छन् । गीतमा दीपककै शब्द छ ।
भिडियोमा गायक आशिष सचिनसँगै मोडल बर्षा राउत देखिएका छन् । गीतमा प्रेमिकाको गुनासो र प्रेमीको परिस्थितिलाई चित्रण गरिएको छ । एल्बम ‘आरोही’मा समावेश गीतको भिडियोलाई सञ्चारकर्मी सुव्रत आचार्यले निर्देशन गरेका छन् ।
पछिल्लो समय गीत ‘मन मगन’मार्फत चर्चामा आएका सुव्रतले यस गीतलाई पनि फिल्मी रुपमा तयार गरेका छन् । गीतमा सुव्रतलाई कन्सेप्ट क्रिएटरको रुपमा उनकै श्रीमती जया शर्माले साथ दिएकी छिन । भिडियोमा उत्सव दाहालको छायांकन तथा नविन निरौलाले कलर र सम्पादन गरेका छन् । गीतको कोरियोग्राफी गम्भीर विष्टले गरेका छन् ।
