काठमाडौं । आगामी वर्षको जेठ १० गतेलाई प्रदर्शन मिति तोक्दै दयाहाङ राई र दीया पुन स्टारर फिल्म ‘दयारानी’ को फस्टलुक सार्वजनिक भएको छ । राजधानीमा मंगलबार एक कार्यक्रमका बीच फिल्मको फस्टलुक सार्वजनिक गरिएको हो । सार्वजनिक फस्टलुकमा दयाहाङ र दीयाको गाउँले अवतार देखाइएको छ । अभिनेता दयाहाङले आफ्नो नामसँग फिल्म नमिल्ने बताए । ‘फिल्मको कथाअनुसार नाम जुराइएको हो । मैले डेढ वर्ष अघि नै यसको स्कृप्ट पढेको थिएँ । मलाई कथा मनपरेको थियो’,उनले भने ।
फिल्मका निर्देशक माओत्से गुरुङले एक खराब श्रीमान र एक दयालु श्रीमतीको कथा फिल्मले देखाउने बताए । गुरुङ फिल्म निर्देशनमा नाम कमाएका माओत्सेको यो नेपाली भाषाको डेब्यु निर्देशन फिल्म हो । उनले गुरुङ समुदायमा दयालु यूवतीलाई दयारानी भन्ने गरिएकोले दीयामार्फत त्यो चरित्र देखाउने बताए । सिनेमा आर्टसको ब्यानरमा निर्माण भएको फिल्मको कथा माओत्सेकै हो ।
फिल्ममा दया र दीयाका अलावा विजय बराल, प्रमिसा गुरुङ, पुस्कर गुरुङ, टिकाराम घलेलगायतका कलाकारहरुको अभिनय छ । फिल्ममा शैलेन्द्र डि. कार्कीको छायांकन, मोहन गुरुङ, किरण गुरुङ, केन्द्र लिम्बु र न्यू आइटी भेन्चर लगानी तथा रामबाबु गुरुङ र अपिल विष्ट कार्यकारी निर्माण छ ।
