काठमाडौं । फिल्म ‘दाल भात तरकारी’को पहिलो गीत ‘भिजिट भिषामा’ सार्वजनिक भएको छ । राजधानीमा शुक्रबार एक कार्यक्रमबीच फिल्म युनिटले फिल्मकर्मी र पत्रकारमाझ गीत सार्वजनिक गरेको हो । त्रिभुवन विमानस्थल र हायात होटलसँगै गणतन्त्र पार्कमा छायांकन गरिएको गीतमा हरिवंश आचार्य, निरुता सिंह, राजाराम पौडेल, वर्षा राउत, पुष्प खड्का र आँचल शर्मा फिचर्ड छन् ।
शम्भुजित बास्कोटाको संगीत रहेको गीतमा निशान भट्टराई र अन्जु पन्तको स्वर छ । गीतमा हरिवंशको शब्द र कविराज गहतराजको कोरियोग्राफी छ । गीतमा ९० बढी कोरस छन् ।
सुदन केसीको निर्देशन रहेको फिल्म मह सञ्चारको व्यानरमा निर्माण भएको छ । फिल्मका कलाकारसमेत रहेका मदनकृष्ण श्रेष्ठले स्वास्थ्यको कारण आफु गीतमा नरहेको बताए । कलाकार हरिवंशले दर्शकको रुचीलाई मध्यनजर गर्दै गीत तयार पारेको बताए । फिल्मका प्रस्तुतकर्ता किरण केसीले छोरा सुदनले देशका ठुला हस्तीलाई एक्सन कट गराएको देख्दा आफुलाई खुशी लागेको बताए ।
निर्देशक सुदनले आफूले मह सञ्चारको इज्जत जोगाउने गरी काम गरेको बताए । फिल्ममा हरिवंश आचार्यको कथा, पटकथा र संवाद, दिर्घ गुरुङको छायांकन, मित्र डी गुरुङको सम्पादन छ । फिल्ममा रमिला आचार्य, नरेन्द्र कंसाकार, शिवहरि पौडेल र यमन श्रेष्ठको लगानी छ । फिल्म आगामी वर्षको वैशाख १३ गते रिलिज हुँदैछ ।
