काठमाडौं । आगामी चैत्र १ मा रिलिज हुने फिल्म ‘जानी नजानी’ को सार्वजनिक गीत ‘एउटीलाई मुटुमा घर’को कभर भिडियो प्रतियोगिता हुने भएको छ । अम्बिका शर्माको शब्द रहेको गीतमा अर्जुन पोखरेलको संगीत तथा अर्जुन र दुर्गा खरेलको स्वर छ । मनिष श्रेष्ठ र सुमी मोक्तान फिचर्ड गीतलाई कविराज गहतराजले कोरियोग्राफ गरेका हुन् । यसलाई युट्युबसँगै टिकटकमा उत्तिकै रुचाइएको छ ।
राजधानीमा एक पत्रकार भेटघाटका बीच निर्माण पक्षले यसको घोषणा गरेको हो । यसगीतमा आफ्नो डान्स भिडियो बनाएर पठाएमा उत्कृष्ट हुने पहिलोले ३२ इन्चको रोवा टिभी, दोस्रोले रोवाकै साउण्ड सिस्टम, तेस्रो र चौथोले हुने २ जनाले द कार्टुन क्रिउसँगको तिन महिने डान्स ट्रेनिङ र पाचौ हुनेले कान्तिपुर फिल्म एकेडेमीमा एक वर्षको फिल्म डिप्लोमा कोर्स गर्न पाउने छन् । भिडियो कम्तिमा १ मिनेटको हुनु पर्नेछ भने यसलाई फागुन २० गते भित्र पठाईसक्नु पर्नेछ । यस भिडियो कभर कम्पिटिसनको निर्णायकको रुपमा नृत्य निर्देशक नरेश वीर सिंह रहेका छन् ।
प्राप्त भिडियो मध्यबाट उत्कृष्ट पाचलाई फागुन २५ गते भित्रमै एक कार्यक्रमको विच पुरस्कार हस्तान्तर गरिनेछ । फिल्ममा मनिष श्रेष्ठ, निरिशा बस्नेत, सन्नी सिंह, नम्रता श्रेष्ठ, प्रकाश अधिकारी, कृष्णभक्त महर्जन, रोशनी केसीलगायतको पनि अभिनय छ ।
आधुनिक प्रेम कथामा आधारित फिल्मको कथा , पटकथा र संवाद सामिप्यराज तिमिल्सेनाले लेखेका हुन् भने यसैफिल्म मार्फत धेरै सफल फिल्ममा मुख्य सहायक निर्देशकको रुपमा काम गरिसकेका बसन्त अधिकारी निर्देशनमा डेब्यु गर्दैछन । रोशनी केसी प्रस्तुतकर्ता रहेको फिल्ममा मोदनाथ खनाल र सागरकाजी माली निर्माता छन् ।
