काठमाडौं । नायक अनमोल केसी र अभिनेता भुवन केसी अभिनेत्री निरुता सिंहको कर्ली कपालमा अल्झिएका छन् । आगामी फागुन १७ गतेबाट रिलिज हुने फिल्म ‘क्याप्टेन’को शुक्रबार सार्वजनिक डान्सिङ नम्बरको गीत ‘कर्ली कपाल’मा केसी बाबुछोरा निरुताको कर्ली कपालमा अल्झिएका हुन् ।
गीतमा हर्क साउद र मनिष ढकालको शब्द, एसडी योगी र सुशान्त गौतमको संगीत तथा एसडी र मेलिना राईको स्वर छ । गीतमा रेनेशा वान्तवा राईको कोरियोग्राफी छ । एक मध्यमवर्गीय युवकले राष्ट्रिय टिमको फुटबल खेलाडी बन्न गरेको संघर्षको कथामा आधारित भएर निर्माण गरिएको फिल्मको पहिलो गीत ‘रहर छ सँगै’ ले चर्चा पाइसकेको छ ।
फिल्ममा नेपालको फूटबल टिमको कप्तानको भूमिका निर्वाह गरेका अनमोल इशान चरित्रमा देखिनेछन् । फिल्ममा अनमोलसँगै उपासना सिंह ठकुरी, प्रियंका एमभी, सुनिल थापा, प्रशान्त ताम्राकार, विल्सन विक्रम राईलगायतको पनि अभिनय छ । दिवाकर भट्टराईको निर्देशनमा तयार भएको फिल्ममा भुवन केसी निर्माता तथा जिया केसी सहनिर्माता छन् ।
