काठमाडौं । फिल्म ‘कान्छी’ रिलिजको ६ महिनापछि नायिका स्वेता खड्का नयाँ फिल्म ‘हेल्लो जिन्दगी’मा अनुबन्धित भएकी छन् । फिल्म ‘भैरे’का निर्माता तथा निर्देशक एभरेस्ट सूर्य बोहोराको यो फिल्ममा स्वेताले अभिनयको सम्झौता गरेकी हुन् ।
निर्देशक बोहोराको निर्देशन र लेखनमा निर्माण हुने फिल्ममा सिर्जना जोशीको लगानी रहनेछ । विरान्जना इन्टरटेन्मेन्टको ब्यानरमा बन्ने फिल्ममा अनुबन्ध भएपछि श्वेताले फेसबुकमार्फत आफ्नो लागि खुसीको पल र एकदमै स्पेशल दिन भएको जनाएकी छन् ।
फिल्म ‘कान्छी’ पछि स्वेता सिन्धुपाल्चोकमा निर्माणाधिन माझी बस्तीको काममा व्यस्त थिइन् । बस्ती निर्माणको व्यस्तताले पछिल्लो समयमा उनी फिल्मी गतिविधिमा खासै सक्रिय थिइनन् ।
