मुम्बई(एजेन्सी) । बलिउड अभिनेता सलमान खानको फिल्म ‘भारत’को ट्रेलर सोमबार सार्वजनिक भएको छ । ट्रेलर रिलिज हुनासाथ सामाजिक सञ्जालमा यसले राम्रो प्रतिक्रिया पाइरहेको छ । तर सबैभन्दा पहिले ट्रेलरमा तारिफ गरेर चर्चामा आएका अभिनेता हुन् शाहरुख खान ।
शाहरुखले ट्रेलरलाई जबरदस्त भन्दै ‘क्या बात हे भाई, बहुत खूब’ भन्दै ट्वीट गरेका छन् । कैयौं बलिउड सेलिब्रेटीले सलमानको कामको तारिफ गरेका छन् । सलमानको फिल्मलाई अली अब्बास जफरले निर्देशन गरेका हुन् । फिल्म इदको मौका पारेर जून ५ मा रिलिज हुँदैछ ।
ट्रेलर आउनासाथ सामाजिक सञ्जालमा बेस्ट ट्रेलरको अवार्ड दिइनुपर्ने आवाज उठेको छ । फिल्ममा सलमानसँग कटरीना कैफले रोमान्स गरेकी छन् । ‘भारत’लाई वर्षकै सबैभन्दा बढी हिट हुने फिल्मको संज्ञा पनि दिइएको छ ।
ट्रेलरको सुरुवात सलमान खान र दिशा पटानीबाट सुरुवात हुन्छ । ट्रेलरमा दिशालाई सर्कसमा काम गर्ने युवतीको चरित्रमा देखाइएको छ । फिल्ममा ज्याकी श्राफ, सुनिल ग्रोभरको पनि अभिनय छ ।
