काठमाडौं । फिल्म ‘प्रेमगीत’ को सिरिज ‘प्रेमगीत ३’ मा मुख्य नायिका गीत बन्नका लागि २५ युवतीबीच कडा प्रतिष्पर्धा हुने भएको छ । फिल्म निर्माण कम्पनी आसुसेन फिल्म्स प्रोडक्सनले फिल्मको मुख्य पात्र गीतका लागि आसुसेन फिल्म्स डट कम तथा आसुसेनको अफिसियल इमेलमा इच्छुक युवतीको लागि आवेदन आव्हान गर्दा २७ सय १७ युवतीले आवेदन दिएका थिए ।
निर्माता तथा निर्देशक सन्तोष सेन, निर्देशक छेतेन गुरुङ, सिनेम्याटोग्राफर राजेश श्रेष्ठ लगायतको टिमले २७ सय १४ जनाबाट उत्कृष्ट २५ छानेको हो । अब उत्कृष्ट २५ बाट अभिनेत्री अर्थात फिल्मको ‘गीत’पात्रका लागि एक युवती छनोंट गरिनेछ । छनौट गर्न लागिएकी युवतीबाट फिल्म भित्रको पात्रको चरित्र, लुक्स, उचाई, अभिनय शैली, सुन्दरतालगायतलाई ध्यान दिइने निर्माता सेनले बताए ।
‘प्रेमगीत’मा प्रदीप खड्कासँग पूजा शर्माले रोमान्स गर्दा ‘प्रेमगीत २’ मा अश्लेषा ठकुरीले गीतको भूमिका निर्वाह गरेकी थिइन् । सेनले उत्कृष्ट २५ मा छानिएका इच्छुकहरुलाई आसुसेन टिमले फोन सम्पर्क गरेर बोलाएर उनीहरुमध्ये एकजनालाई क्षमता, लुक्स, उचाई, सुन्दरताको मापन गरेर गीत क्यारेक्टरमा छानिने खुलाए । फिल्म आगामी चैत २८ मा रिलिज हुनेछ ।
