काठमाडौं । सौगात मल्ल अभिनित फिल्म ‘माछा माछा’ आगामी कार्तिक २९ गते रिलिज हुने भएको छ । प्रदर्शन मिति तय गरिएको छ । तीन जना गाउँले युवकहरुले शहरिया जीवन स्थापित गर्न लागिपरेको संघर्षको कथामा फिल्ममा सौगातसँगै विजय बराल र अनोज पाण्डे प्रमुख भूमिकामा छन् । फिल्ममा सुनिल गुरुङको लेखन तथा निर्देशन छ ।
सार्वजनिक पोस्टरमा सौगात, विजय र अनोजको समुह र माओत्से गुरुङको समुह छुट्टिएको छ । माओत्सेको समुहले समातेको क्रिकेटको ब्याट, बल र स्टम्प दर्शकमा कौतुहलता सृजना गर्छ ।
पोस्टरमा अभिनेत्री नम्रता श्रेष्ठलाई पनि स्थान दिइएको छ । मणिराम पोखरेल कार्यकारी निर्माता रहेको सिनेमामा प्रवीण खतिवडा, पुस्कर गुरुङ, कमलमणि नेपाल, भोलाराज सापकोटा, सरिता गिरी, धुर्व कोइराला, बसन्त भट्ट लगायतका कलाकारको पनि अभिनय छ ।
सिनेमा आर्ट र नौमती इन्टरटेनमेन्टको व्यानरमा निर्मित फिल्ममा रामबाबु गुरुङ र दयाहाङ राईको लगानी छ । फिल्मको सहनिर्मातामा ओमचंद्र रौनियार र अर्जुन कार्की छन् । फिल्ममा अनुपम शर्माको संगीत, निमेष श्रेष्ठको सम्पादन, शिवराम श्रेष्ठको छायाँकन र निर्देशक गुरुङको लेखन छ ।
