काठमाडौं । नायक अनमोल केसीसँग फिल्म ‘ड्रिम्स’बाट नेपाली रजतपटमा पाइला टेकेकी साम्राज्ञी राज्यलक्ष्मी शाह अहिले रुचाइएकी नायिकामा पर्छिन् । सुन्दर अनुहार, ग्ल्यामर लुक्ससँगै बद्लिदो अभिनय शैलीले जोकोही पनि प्रभावित छन् । यिनै साम्राज्ञी यतिबेला प्रहरीको फन्दामा परेकी छन् । तर उनी के कारणले प्रहरीको फन्दामा परेकी हुन् भन्ने कुरा खुलेको छैन ।
दर्शकले रुचाएको यी नायिका कसरी फन्दामा परिन् भन्ने थाहा पाउन दर्शकले उनी अभिनित फिल्म ‘मारुनी’ हेर्नैपर्छ । फिल्मको सोमबार सार्वजनिक ट्रेलरमा नायक पुष्प खड्काको प्रेममा आशक्त साम्राज्ञीलाई प्रहरीले पक्राउ गरेर लगेको दृश्य देखाइएको छ । ट्रेलरको अर्को दृश्यमा हातमा छुरी बोकेर हिँडेको पनि देखाइएको छ ।
नवल नेपालको लेखन तथा निर्देशन रहेको फिल्ममा पुष्प र साम्राज्ञीसँगै रेविका गुरुङ, अर्जुन श्रेष्ठ, सुशिल क्षेत्री, विनोद भट्टराई, शंखर सेडाई र कुसाग्र भट्टराईलगायतका कलाकारको अभिनय छ ।
आगामी भदौ १३ गते रिलिज हुने फिल्ममा पुनम क्षेत्री गौतमको लगानी छ । उनलाई फिल्म निर्माणमा राजा प्रधान, दर्शन केसी र मिना क्षेत्रीले सघाएका छन् ।
