काठमाडौं । गोपीकृष्ण मुभिजको व्यानरमा निर्मित सुपरहिट फिल्म ‘पर्खि बसें’ को नयाँसिरिज ‘पर्खि बसें २’ निर्माण हुने भएको छ । फिल्म ‘पर्खि बसें’ निर्माण र रिलिज भएको झन्डै १३ वर्षपछि सिरिज बन्न लागेको हो । गोपीकृष्ण मुभिजले हिमालयन मुभी स्टुडियोसँगको सहकार्यमा सिरिज निर्माण गर्न लागेको हो ।
गोपीकृष्ण मुभिजका तर्फबाट निकिता पौडेल र हिमालयन मुभी स्टुडियोका तर्फबाट विनोद सापकोटाले गत बिहीबार सम्झौतापत्रमा हस्ताक्षर गरे । फिल्ममा निकिता र विनोद निर्माता रहनेछन् भने प्रदीप दाहाल र तिर्थप्रसाद पौडेल सह–निर्माता हुनेछन् । २०६४ को चैत्र अन्तिममा प्रदर्शनमा आएको फिल्म ‘पर्खि बसें’ लाई दीपक श्रेष्ठले निर्देशन गरेका थिए भने यसको दोस्रो सिरिजलाई ‘लभ डायरिज’ निर्देशक सौभर चौधरीले निर्देशन गर्नेछन् । फिल्ममा कथा पनि उनकै रहनेछ ।
पहिलो सिरिज झैँ दोस्रोमा पनि सांगीतिक प्रेम कथा देखाइने सौरभले बताए । फिल्मलाई अल नेपाल वितरणको जिम्मा करण श्रेष्ठ अर्थात रीच इन्टरटेनमेन्टले पाएको छ । फिल्ममा रहने कलाकार र प्राविधिक औपचारिक कार्यक्रमको आयोजना गर्दै सार्वजनिक गरिनेछ । अघिल्लो संस्करणमा राजबल्लभ कोइराला, युना उप्रेती, निखिल उप्रेतीलगायतको अभिनय रहेको थियो ।
गोपीकृष्ण मुभिजले निर्माण गर्ने भनिएको ‘माइकल अधिकारी’आउँदो माघबाट फ्लोरमा जादैछ । त्यसपछि यो टिमको ’पर्खि बसें २’ फ्लोरमा जाने सेड्युल रहेको छ । यसको रिलिज २०७७ सालमा हुनेछ ।
