मुम्बई(एजेन्सी) । भोजपुरी स्टार दिनेशलाल यादव निरहुआलाई अब दर्शकले रोमियो राजाको रूपमा हेर्न पाउने भएका छन् । आगामी फिल्म ‘रोमियो राजा’ को सार्वजनिक फस्र्ट लुकमा निरहुआको नयाँ लुक सार्वजनिक भएको हो । मनोज नारायणको लेखन र निर्देशनमा बन्ने यो फिल्ममा राजेशकुमार बर्मा र बाबू भाई निर्माता छन् । फिल्म सोहम फिल्म्स र बिग बलिउड पिक्चर्सको ब्यानरमा बनेको हो ।
मधुकर आनन्दको संगीत रहने फिल्ममा दिनेशको अपोजिटमा आम्रपाली दुबे हुनेछिन् । फिल्म यसै वर्षको होलीको अवसरमा मार्च ६ प्रदर्शनमा आउँदैछ । फिल्मको फस्र्ट लुकमा निरहुआलाई निकै हेण्डसम अवतारमा बाइकमा स्टाइलिस मुडमा देखाइएको छ ।
निर्देशक मनोज नारायणका अनुसार फिल्मको सुटिङ झारखण्डको सुन्दर लोकेसनमा गरिएको छ । उनले फिल्मको एक्सन दृश्य र गीतलाई निकै उत्कृष्ट ढंगले छायांकन गरिएको छ । फिल्मले सरकारी विद्यालयमा पढाई नहुने र निजी विद्यालयमा शिक्षाको नाममा भइरहेको धाधलीलाई प्रमुख कथा बनाएको छ । फिल्मका नायकले कसरी शिक्षा प्रणालीमा व्याप्त भ्रष्टाचार र खराब व्यवहारको अन्त्य गर्छन् भन्ने विषयलाई देखाइनेछ । फिल्ममा रामशरण उप्रेतीको छायांकन, कविराज गहतराजको कोरियोग्राफी र विपिन मल्लको सम्पादन रहनेछ ।
