मुम्बई(एजेन्सी) । अष्ट्रेलियाली क्रिकेटर डेभिड वार्नरले भारतका सुपरस्टार प्रभासको सुपरहिट फिल्म ‘बाहुबली’को अमरेन्द्र बाहुबलीको रुप धारण गरेका छन् । उनले इस्टाग्राममा पोस्ट गरेको बाहुबली रुपी भिडियोलाई लाखौंले हेरिसकेका छन् । डेभिडले बाहुबली शैलीमा शिरमा मुकुट पहिरिएका छन् । जसमा उनी निकै सुन्दर देखिएका छन् ।
डेभिडले भिडियोमार्फत आफ्ना प्रशंसकलाई भरपुर मनोरन्जन दिएका छन् । भिडियोमा उनले प्रभासको संवाद पनि बोलेका छन् । उनले प्रभासको जस्तै लुगा पनि लगाएका छन् । जसमा एक बाघको रुप पनि धारण गरिएको छ । उनले भिडियो शेयर गर्दै आफ्ना फलोअरलाई ‘फिल्म अनुमान लगाउनुहोस्’ भन्दै सोधेका छन् । उनको भारतीय प्रशंसकले उनको प्रदर्शनको सराहना गर्दै केहीले ‘तेलुगू फिल्म उद्योगले एउटा ठूलो कलाकार भेट्टाएको छ’ समेत लेखेका छन् ।
डेभिड आइपीएलका कारण भारतमा लोकप्रिय छन् । उनको टिमलाई उनले आफ्नो बलले कैयौं खेल जिताएका छन् । डेभिड हाल आफ्ना परिवारका साथ सेल्फ आइसोलेसनमा छन् ।
