काठमाडौं । अभिनेता प्रदीप खड्कालाई अहिलेको पुस्ताको चकलेटी अभिनेता भन्दा फरक नपार्ला । उनले अहिलेसम्म अभिनय गरेका फिल्ममा उनको त्यो भाव प्रष्ट देखिन्छ । यिनै अभिनेता फाट्ट फुट्ट म्यूजिक भिडियोमा पनि देखिन्छन् ।
गायक सत्य–स्वरुपराज आचार्य, प्रताप दास, गायिका प्रविशा अधिकारी र विपिन घिमिरेको स्वर रहेको गीत ‘जय जय नेपाल’मा प्रदीपलाई राष्ट्रवादी गेटअपमा प्रस्तुत गरिएको छ । गीतमा नितिन चन्दको निर्देशन छ । भिडियोको सार्वजनिक टिजरमा उनको गेटअप र हातमा बोकेको राष्ट्रिय झण्डाले उनको राष्ट्रवादी छनक प्रष्ट देख्न सकिन्छ ।
भिडियोमा नीति शाह तथा बाल कलाकार आरिहान पौडेल र निवान चन्दको पनि अभिनय छ । अशोक शेरचनको शब्द रहेको गीतमा एलिस कार्कीको संगीत छ । प्रवेश पौडेल कार्यकारी निर्माता रहेको भिडियोमा रुपेश थापाको सम्पादन र छायांकन छ ।
