मुम्बई(एजेन्सी) । बलिउड अभिनेता सलमान खान फिल्म उद्योगका एक सुपरचित अभिनेता हुन् । उनी आफ्नो फिल्मसँगै मानवीय सेवाका लागि पनि प्रसिद्ध छन् । उनले आफ्नो फिल्मी करियरमा कैयौं सुपरहिट फिल्म दिएका छन् । कोभिड–१९ को जारी लकडाउनका कारण उनी बितेका तीन महिना आफ्नो फार्म हाउसमै थिए । जहाँ उनले कैयौं गीतको सुटिङ गरे र ती गीत आफ्नो युट्युब च्यानलबाट सार्वजनिक पनि गरे ।
सलमानलाई सारा विश्वले ‘सल्लू’ नामले पनि चिन्दछ । तर उनी ‘सल्लू’ कसरी बने भन्ने एउटा किस्सा उनैले खुलासा गरेका छन् । हालैका दिनमा एक भिडियो भाइरल भइरहेको छ, जसमा उनले आफूलाई ‘सल्लू’ नाम दिने व्यक्तिको बारेमा कुराकानी गरेका छन् ।
सलमानका अनुसार उनले यो नाम अभिनेता ज्याकी श्राफबाट पाएका हुन् । ज्याकीले ‘सल्लू’ भनेर बोलाउन शुरुवात गरेका थिए । यति मात्र होइन, ज्याकीले सलमानलाई कैयौंपटक ‘सुल्लू’, ‘सल्ले’लगायतका अन्य कैयौं नामले बोलाउदा रहेछन् । भिडियोमा सलमानसँगै ज्याकी र अभिनेता सन्जय दत्त पनि देखिएका छन् । भिडियोमा सलमान ज्याकीले दिएको नाममा चर्चा गरिरहेका छन् ।
