मुम्बई(एजेन्सी) । बलिउड अभिनेत्री दीपिका पादुकोण र अभिनेता प्रभास फिल्ममा सँगै देखिने खबरले उनीहरुका फ्यान पुलकित भएका छन् । सँगै फिल्ममा देखिने भएपछि फ्यानहरुले उनीहरुको सम्बन्धलाई नजिकबाट नियाल्न थालेका छन् । हालैमात्र दुई कलाकारले सामाजिक सन्जालमा एकअर्कालाई फलो गरेका छन् ।
फिल्म ‘बाहुबली’ अभिनेता प्रभास इन्स्टाग्राममा केवल पाँच व्यक्तिहरुलाई मात्र फलो गर्छन्, जसमा पूजा हेगडे, श्रद्धा कपूर र भाग्यश्री प्रमुख छन् । अब यो सूचीमा दीपिका पनि जोडिएकी छन् । दीपिकाले पनि इन्स्टाग्राममा प्रभासलाई फलो गरेकी छन् । केही दिन अघि मात्र प्रभासले पूजाका साथ नयाँ फिल्मको घोषणा गरेका थिए । उनले फिल्मको फस्र्टलुक पोस्टर पनि सार्वजनिक गरेका थिए ।
दीपिका र प्रभास निर्देशक नाग अश्विनले निर्देशन गर्ने तीन भाषा(हिन्दी, तमिल र तेलूगु)को फिल्ममा देखिँदैछन् । दीपिका पछिल्लो पटक मेघना गुलजारको फिल्म ‘छपाक’ मा सहकलाकार विक्रान्त मेसीका साथ देखिएकी थिइन् । उनी चाँडै फिल्म ‘८३’ मा पति रणवीर सिंहसँग देखिँदैछिन् । विवाह पछि रणवीर र दीपिकाको यो पहिलो फिल्म हो । कबीर खानद्वारा निर्देशित यो फिल्ममा दीपिका रोमी देव अर्थात् कपिल देवकी श्रीमतिको भूमिकामा देखिँदैछिन् ।
