मुम्बई(एजेन्सी) । फिल्म ‘बाहुबली’ स्टार प्रभास दक्षिण मात्र होइन, उत्तर भारतका दर्शकको रुचाइएका अभिनेता हुन् । उनको फ्यान फलोइङ दुवै क्षेत्रमा उत्तिकै छ । यही कारण बाहुबलीको बम्पर सफलताले प्रभासलाई बलिउडमा एकपछि अर्को फिल्मको अफर आइरहेको छ । उनको दक्षिण भारतीय फिल्मलाई हिन्दी भर्सनमा रिलिजको तयारी पनि भइरहेको छ । प्रभासको पछिल्लो फिल्म ‘साहो’को क्रेज पनि उस्तै थियो । उनको आउन लागेको फिल्म ‘राधे श्याम’ लाई लिएर दर्शकमा उत्साह उस्तै छ ।
यसैबीचमा प्रभासलाई एकपटक पुनः भूषण कुमार आफ्नो फिल्ममा लिने तयारी गरिरहेका छन् । टीसीरीजका मालिक भूषण आफ्नो फिल्मलाई ‘बाहुबली’ कै रुपमा बनाउने तयारीमा छन् । जसमा एक पौराणिक कथा हुनेछ । फिल्मका लागि प्रभासले पनि हरियो झन्डा देखाइसकेका छन् । प्रभासलाई फिल्मको कथा निकै मनपरेको छ । फिल्मलाई भूषणले ठूलो बजेटमा बनाउने तयारी गरिरहेका छन् ।
‘प्रभासलाई भारतीय लोककथामा आधारित एक फिल्मको अफर आएको छ । जो पौराणिक कथामा आधारित हुनेछ । फिल्मका लागि भूषण कुमारले योजना पनि बनाएका छन् । यो एक्सन प्याक पीरियड ड्रामा हो, जसमा भारतीय इतिहास र पौराणिक कथाहरुको झलक मिल्नेछ । फिल्मलाई बाहुबली फ्रेन्चाइजीका रुपमा बनाइने भएकाले पनि प्रभासले फिल्म प्रति चासो देखाएका छन् ।’ फिल्म निकट स्रोतले भनेको छ ।
