मुम्बई(एजेन्सी) । निर्देशक ओम राउतको फिल्म ‘आदिपुरुष’मा अभिनेता सैफ अली खानको प्रवेश भएको छ । सैफ फिल्ममा लंकेशको भूमिका निभाउनेछन् । यो भूमिका रावणमा आधारित छ । निर्देशक राउतसँगको सैफको यो दोस्रो सहकार्य हुनेछ ।
यसअघि उनले सन् २०२० को हिट फिल्म ‘तान्हा जी–द अनसङ वारियर’मा उदयभान सिंह राठौडको नकारात्मक भूमिका निर्वाह गरेका थिए । जुन भूमिका दर्शकलाई निकै मनपरेको थियो । फिल्म ‘आदिपुरुष’का प्रमुख कलाकार प्रभासले सैफको नाम सामाजिक सन्जालमार्फत घोषणा गरेका हुन् ।
बिहीबार विहान ७ बजेर ११ मिनेटमा उनले इन्स्टाग्राममा एक फोटो शेयर गरेका थिए । दोस्रो पोस्टर पनि पहिलो पोस्टरकै जस्तो छ, जसमा ठूलो ‘ए’ लेखिएको छ । पृष्ठभूमि रंगलाई परिवर्तन गरेर निलो बनाइएको छ । पोस्टरको माथि रावणको मुखाकृति देखिएको छ । हनुमान र धनुष लिएको रामको छवि पनि अंकित छ । यो पोस्टरसँगै प्रभासले ‘७ हजार वर्ष पहिले विश्वकै सबैभन्दा बुद्धिमान दानव बस्दथ्यो’ भनेर लेखेका छन् ।
यसअघि बुधबार साँझ फिल्मको विषयलाई लिएर ठूलो घोषणा हुने जानकारी दिइएको थियो । फिल्ममा कीर्ति सुरेश सीताको भूमिकामा देखिँदैछिन् ।
