काठमाडौं । गायिका अन्जु पन्तको स्वरमा समावेश ‘छटपटी’ बोलको गीतको म्युजिक भिडियो सार्वजनिक भएको छ । इजरायलमा बसेर आफ्नो संगीत यात्रालाई अघि बढाइरहेका गायक, गीतकार तथा संगीतकार राज लिम्बुको यस गीतमा शब्द र संगीत रहेको छ ।
प्रेम सम्बन्धमा आउने उतारचढाव, अविश्वास र पीडालाई समेटेर तयार पारिएको यस गीतलाई दीपकराज विश्वकर्माले संगीत संयोजन गरेका हुन् । यसअघि गायक लिम्बुको स्वरमा ‘बुझिदेउ’, ‘म पागल’, ‘जलेर खरानी’ लगायतका थुप्रै गीतहरु सार्वजनिक भैसकेका छन् ।
वियोगान्त प्रेम कथालाई समेटेर तयार पारिएको यस गीतको म्युजिक भिडियोमा नीता क्षेत्री, टेकेन्द्र कार्की र बिष्णु कट्टेलबीचको त्रिकोणात्मक प्रेमकथा प्रस्तुत गरिएको छ ।
इजरायलमा छायांकन गरिएको यस भिडियोमा सन्तोष माबो (माबो क्रिएशन) को छायांकन, सम्पादन र निर्देशन छ । गायक लिम्बुको आधिकारिक च्यानल राज लिम्बुमार्फत भिडियो सार्वजनिक गरिएको हो ।
