काठमाडौं । युट्युब र टिकटकमा हिट भएको गीत ‘सम्झिनी पानी छम्किनी’ मा अब फिल्म बन्ने भएको छ । गीतका गायक तथा मोडल सम्राट चौलागाइँले आफ्नो हिट गीत ‘सम्झिनी पानी छम्किनी’को नाममा फिल्म बनाउन लागेका हुन् ।
करिब एक महिना अगाडि सार्वजनिक भएको यो गीतको तीज भर्सनलाई हालसम्म १ करोड भन्दा बढीले हेरिसकेका छन् । यसअघि यो गीतको पहिलो भाग पनि हिट भएको थियो ।
सम्राटको फिल्मलाई निर्देशक विक्रम स्वाँरले निर्देशन गर्नेछन् । गायक चौलागाईंले सबै उमेरका दर्शकले गीत मनपराएकाले यही नामलाई लिएर फिल्म बनाउन लागिएको बताए ।
उनका अनुसार हाल फिल्मको स्क्रिप्ट लेखनको काम भइरहेको छ । कोभिड महामारी कम भएपछि फिल्मको छायांकन थालिने उनले बताए ।
