काठमाडौं । कलाकार सागर लम्साल ‘बले’ अभिनित नयाँ म्युजिक भिडियो सार्वजनिक भएको छ । झण्डै २० बर्ष अगाडि रेकर्ड गरिएको प्रमोद निर्वाणको ‘किन यसरी’ बोलको गीत नयाँ भर्सनमा रेकर्ड गरी भिडियो सार्वजनिक भएको हो ।
गीतमा सागरसँगै शिक्षा संग्रौला, कुशल विष्ट र सन्जिता पाण्डे ‘सानु’को अभिनय छ । २० वर्ष पछि गीतमा गायक प्रमोद निर्वाणले केही नयाँ स्वाद र महिला स्वर पनि समावेश गरिएको छ । गीतमा सरला बीसीले साथ दिएकी छिन् ।
गोल्डेन मड क्रिएशनको ‘किन यसरी’ लाई बले इन्टरटेनमेन्टको युट्युब च्यानलबाट भिडियो सार्वजनिक गरिएको हो । निकेश खड्का निर्देशित भिडियोमा प्रेममा हुने असमझदारी, दुर्घट्ना, पश्चातापलाई कलात्मक शैलीले प्रस्तुत गरिएको छ । बुद्ध थापाको छायांकन रहेको भिडियोमा विकास धमलाको सम्पादन छ ।
