काठमाडौं । तिहारको अवसर पारेर कार्तिक १७ गतेदेखि देशभरका हलमा एकसाथ प्रदर्शन हुने फिल्म ‘चोर र पुलिस’को टिजर सार्वजनिक भएको छ । फिल्मको टिजर शुक्रबार म्युजिक नेपाल युट्युब च्यानलमार्फत दर्शकमाझ ल्याइएको हो ।
आरएल मोक्तानको निर्देशनमा बनेको फिल्मको टिजरमा फिल्मका प्रमुख कलाकारहरुलाई प्राथमिकता दिइएको छ । फिल्ममा धीरेन शाक्य, राजेन्द्र खड्गी, बुद्धी तामाङ, जयनन्द लामा, जयकिसन बस्नेत, रवी गिरी, शोभित बस्नेत, रामचन्द्र अधिकारी, सुरवीर पण्डित, जाहान्वी बस्नेत, कविता राया, सुलेमान शंकर ‘इकु’, अर्जुन गुरुङ, सुभाष गजुरेल, शारदा गिरी, रश्मी भट्ट, रेशम फिरिरी, मदन ताम्राकार, आरएल लामा, सुशान्त राई ‘भाले डन’लगायतको अभिनय छ ।
आरआर फिल्मसले वितरण गर्ने फिल्मको निर्मातामा आर सोनाम मोक्तान र लंकामाया मोक्तान छन् । करणबहादुर विष्ट सह–निर्माता रहेको फिल्मको प्रस्तुतकर्ता खड्क लामा मोक्तान हुन् भने जीवन लामा कार्यकारी निर्माता छन् ।
रामेश्वर हुमागाईको छायांकन रहेको फिल्ममा विकास चौधरीको संगीत, तारा थापा ‘किम्भे’को सम्पादन र राजु किराँतीको द्वन्द्व छ ।
निर्देशक आरएलले मान्छे किन चोर बन्छ, समाजले चोरलाई कसरी हेर्छलगायतको मार्मिक बिषयमा फिल्म निर्माण गरेको बताए ।
