काठमाडौं । डिजिटल प्लेटफर्म टिकटकमा केन्द्रित रहेर टेलिभिजन रियालिटी शो ‘शिखर टिकटक स्टार नेपाल रियालिटी शो २०७८’ को घोषणा गरिएको छ । शिखर नेपालले आयोजना गर्न लागेको शोमा अभिनय, गायन, नृत्य तथा क्रियटिभ प्रस्तुतिको माध्यमबाट सहभागी हुन सकिनेछ ।
शोमा गौरी मल्ल, रमेश उप्रेती तथा वर्षा शिवाकोटी निर्णायक छन् । शोमा प्रथम हुनेलाई कार, दोस्रो हुनेलाई मोटरसाइकल र तेस्रोलाई स्कुटर उपहारसँगै टप १० भित्र पर्ने प्रतिस्पर्धीहरुलाई कम्प्युटर, क्यामेरा, टेलिभिजन, फ्रिज, मोबाइल, घडी लगायतका उपहार दिइनेछ ।
शोको घोषणा कार्यक्रममा श्रम, रोजगार तथा सामाजिक सुरक्षा मन्त्री कृष्णकुमार श्रेष्ठ ‘किसान’ले भुवन केसी, अभिनेता सरोज खनाल, उद्धव पौड्याल, पुकार भट्टराई, सन्दिप अर्याल, साहित्यकार भिष्मराज फुलारा तथा सञ्चारकर्मी सुदर्शनप्रसाद आचार्यलाई ‘शिखर सम्मान २०७८’बाट सम्मान गरेका थिए ।
टिकटकलाई पनि कला क्षेत्रमा राम्रा प्रतिभा उत्पादन गर्ने प्लेटफर्म बनाउन सकिन्छ भन्ने उद्देश्यका साथ कार्यक्रम आयोजना गर्न लागिएको शिखर नेपालका अध्यक्ष शेखर खनालले बताए ।
नाईस टेलिभिजन एचडीबाट प्रशारणमा आउंने शोमा टेकप्रसाद बास्तोला निर्माताका रुपमा रहेका छन् । गायन, नृत्य, अभिनय तथा क्रियटिभ प्रस्तुति रहने भिडियो १५ सेकेण्ड देखि ३ मिनेट सम्मको हुनुपर्नेछ भने अनलाईन अडिसनको समय मंसिर मसान्तसम्म आव्हान गरिएको छ ।
