काठमाडौं । २०७६ फागुन ३० गते रिलिजको तयारीमा रहँदा पोस्टपोण्ड भएको फिल्म ‘म यस्तो गीत गाउँछु २’ झण्डै २० महिना पछि दर्शकमाझ आउने भएको छ । फिल्मका निर्देशक सुदर्शन थापाका अनुसार फिल्म आगामी माघ १९ गते रिलिज हुँदैछ ।
फिल्मको नयाँ पोष्टर सार्वजनिक गर्दै यसका निर्देशक तथा निर्माता थापाले माघको १९ गतेबाट फिल्म रिलिज हुने जानकारी दिए । उनले भने–‘दर्शकले फिल्मकाे प्रतिक्षा गरिरहनुभएको छ । यसैले, यो प्रेम कथाको चलचित्रलाई हामीले प्रेम दिवसको छेको पारेर रिलिज गर्ने तयारी गरेका हौं ।’
सुदर्शन थापा र नायिका पूजा शर्माको निर्माणमा तयार भएको यो फिल्मका सह–निर्माता जन्म जय सम्पाङ राई हुन् । फिल्ममा नायिका पूजा शर्मा, नायक पल शाहको साथमा कलाकारहरु हरिहर शर्मा, दिनेश डीसी, राजा राजेन्द्र पोखरेल, गणेश गिरी लगायतको अभिनय छ ।
फिल्ममा सौरभ लामाको छायांकन, रामजी लामिछानेको कोरियोग्राफी, शिवम अधिकारी र दिनेश न्यौपानेको पटकथा, सुदर्शन थापाको कथा, बनिष शाह र मिलन श्रेष्ठको सम्पादन छ ।
