काठमाडौं । अभिनेता सौगात मल्ल, बुद्धि तामाङ र दिया पुन स्टारर फिल्म ‘मन्त्र’को पोस्टरसहित प्रदर्शन मिति सार्वजनिक भएको छ । कोरोना महामारी र लकडाउनका कारण फिल्म प्रदर्शनमा ढिलाई भइरहँदा निर्माण युनिले आगामी माघ २८ लाई रिलिज मिति तोकेको छ ।
गोर्खा सिरानचोक एण्ड लिगलिग कोट फिल्मस्को ब्यानरमा बनेको फिल्मका वितरक गोविन्द शाही हुन् । करिब ५१ सय मिटरभन्दा माथिको उचाई मनास्लु हिमालको बेस क्याम्पसम्म पुगेर फिल्मको छायांकन गरिएको निर्देशक खिलबहादुर गुरुङले बताए ।
सार्वजनिक पोस्टरमा फिल्मका मुख्य कलाकार सौगात मल्ल, बुद्धि तामाङ र दिया पुनलाई स्थान दिइएको छ । फिल्म गोरखाको मनास्लु क्षेत्र आसपासको कथावस्तुलाई आधार बनाएर निर्माण गरिएको छ । फिल्ममा गोर्खा जिल्लाको चुम नुब्री सामा गाउँ, वीरेन्द्र ताल र पुङ्गिन गुम्बालगायतका रमणीय दृश्यहरु कैद गरिएको छ ।
फिल्ममा नमिता घिसिङ, वीरबहादुर लामा, पासाङ टि शेर्पाको पनि अभिनय छ । देवेन्द्र मानन्धर कार्यकारी निर्माता रहेको फिल्ममा रवीराज कार्की, सुरेश कार्की र सुभ श्रेष्ठको लगानी रहेको छ ।
साम्तेन भुटियाको लेखन रहेको फिल्ममा सन्तोष सुनारको संगीत, सञ्जय लामाको छायांकन, मित्र डि गुरुङको सम्पादन, सुजिल कर्माचार्यको पाश्र्व संगीत छ ।
