मुम्बई(एजेन्सी । बलिउड अभिनेता सलमान खानका अभिनेता तथा निर्देशक भाई सोहेल खान पत्नी सीमासँग विवाहको २४ वर्षपछि अलग्गिँदै छन् । शुक्रबार दुवैले मुम्बईको फेमिली कोर्टमा गएर अलग्गिनका लागि निवेदन दिएका छन् । बीकेसी फेमिली कोर्टमास डिभोर्सको निवेदन दिएपछि दुवैजना आ—आफ्नो कारमा घर गएका थिए । दुवैको तस्वीर सामाजिक सञ्जालमा भाइरल भइरहेको छ ।
भारतीय सञ्चारमाध्यमले निवेदन दिएको कुरा उल्लेख गरे पनि दुवै पक्षले यस विषयमा केही बोलेको छैन । तर दुवैबीच निकै लामो समयदेखि सम्बन्धमा चिसोपन आइरहेको थियो ।
सोहेल र सीमाले सन् १९९८ मा भागी विवाह गरेका थिए । सीमा दिल्लीकी हुन् । उनी फेसन डिजाइनिङमा करियर बनाउनका लागि मुम्बई आएकी थिइन् । मुम्बईमा सीमासँग भेटेपछि सोहेल उनको प्रेममा परेका थिए । उनीहरुले डेट सुरु गरेपनि छिट्टै विवाह गर्ने चाहना राखेका थिए । तर सीमाको परिवारले उनीहरुको विवाहमा स्वीकृति दिएन । जसकारण उनीहरुले भागी विवाह गरेका थिए ।
सीमा एक पञ्जाबी परिवारकी युवती हुन् । विवाह अघि उनको नाम सीमा सचदेव थियो । सोहेलको फिल्म ‘प्यार किया तो डरना क्या’ रिलिजको दिन उनीहरुले आर्य समाज मन्दिरमा भागी विवाह गरेका थिए । उनीहरुका निर्वाण र योहान नामका दुई छोरा छन् ।
