मुम्बई(एजेन्सी) । अभिनेता अक्षय कुमारको फिल्म ‘ओह माई गड २’ उर्फ ‘ओएमजी २’को ट्रेलर हालै रिलिज भएको थियो । जुन ट्रेलर हेरेपछि दर्शकहरु फिल्मप्रति उत्साहित छन् । फिल्म ‘ओएमजी’ धर्म, धार्मिक संस्था र स्व–घोषित भगवानमा विश्वास गर्ने व्यक्तिका वरपर घुमेको थियो भने ‘ओएमजी २’ यौन शिक्षा वरपर घुमेको छ ।
यो फिल्ममा अक्षय कुमार भगवान शिवको दुतको भूमिकामा देखिँदैछन् । यो फिल्मको स्क्रिप्ट अक्षयले अस्पतालको शैय्याबाट फाइनल गरेका थिए । अक्षयलाई यो फिल्मको स्क्रिप्ट अफर हुँदा उनलाई कोभिड–१९ भएको थियो । आफूलाई कोभिड देखिएपछि उनले ढिला नगरीकन अस्पताल भर्ना हुने निर्णय लिएका थिए । उनले अस्पतालको शय्याबाट सुतेरै भिडियो कलका माध्यमबाट स्क्रिप्ट फाइनल गरेका थिए ।
यो फिल्ममा पंकज त्रिपाठी प्रमुख भूमिकामा छन्, जो प्रणालीको विरुद्ध विद्रोह गर्छन् । फिल्ममा यामी गौतमले विपक्षी वकिलको भूमिका निर्वाह गरेकी छन् । फिल्मले सेन्सर बोर्डबाट एडल्ट सर्टिफिकेट पाएको छ ।
