धरान । श्रम संस्कृतिको शहरको रुपमा अन्तरास्ट्रियस्तरमा धरानलाई चिनाउने धरान उपमहानगरपालिकाका मेयर हर्क साम्पाङप्रति समर्पित गरेर तयार पारिएको ‘हे हर्क अघि बढ पछि नफर्क’ बोलको गीत म्युजिक भिडियोसहित एक कार्यक्रमका बीच सार्वजनिक गरिएको छ ।
गत बिहिबार एक समारोहबीच धरान ८ बराह मलस्थित फ्रेन्ड्स सिनेमा हलको पर्दामा भिडियो सार्वजनिक गरिएको थियो। सेवक अभियानका संयोजक राजिब हलवाईको रचना तथा निरज श्रेष्ठको संगीत रहेको उक्त गीतमा गायक राजेशपायल राईले स्वर रहेको छ। उक्त गीत सिल्भर इन्टरटेन्मेन्टको अफिसियल युट्युब च्यानलबाट विश्वव्यापी रिलिज गरिएको हो ।
गीत सार्वजनिक कार्यक्रममा मेयर हर्क साम्पाङ आफ्नो परिवारसहित सहभागी थिए भने उपमेयर अइन्द्रबिक्रम बेघा, नायिका रेखा लिम्बु, गीतकार मीना सिंगकसहित श्रमदाताहरुको ठुलो संख्यामा उपस्थिति रहेको थियो ।
सिल्भर इन्टरटेन्मेन्टका निर्देशक सौरभ श्रेष्ठको परिकल्पना र आग्रहमा एकै रातमा गीत लेखेको र यो गीत मेयर साम्पाङ्गको अहिलेसम्म गरेका काम तथा गतिबिधिसंगै उनलाई सुझावसमेत दिने प्रयास गरेको गीतकार हलवाईले बताए । मेयर साम्पाङको श्रम अभियान र विकासको कार्यबाट आफु प्रभावित भएर गीतको माध्यमबाट योगदान दिने प्रयास गरेको उनले बताए ।
गीतको म्युजिक भिडियोमा मेयर साम्पाङ निवार्चित भएको, सपथ ग्रहण गरेको र त्यसपछि खानेपानी, वृक्षारोपण, लगायत कार्यमा भएको श्रमदान अभियान, लागुपर्दार्थ दुर्व्यसन बिरुद्धको अभियान को दृष्यहरुलाई कैद गरिएको छ ।
मेयर साम्पाङ्गको कामबाट प्रभावित रहेको बताउँदै यो गीत श्रमदाताहरु प्रति समर्पित रहेको गायक राजेशपायल राईले बताए ।
मेयर साम्पाङले गीतसँगै भिडियो राम्रो बनेको प्रतिक्रिया दिए । उनले हर्क अब आफ्नो एक्लो नाम नभएको र देश उठाउन परिश्रम गर्ने व्यक्तिको नाम भएको पनि बताए ।
उपमेयर अइन्द्रबिक्रम बेघाले पनि गीतले धरानमा के हुदैछ र धरानको पहिचान कस्तो बनाउदैछौं भनेर भिडियोले प्रष्ट पारेको बताए । सिल्भर इन्टरटेन्मेन्टको निर्माण रहेको म्युजिक भिडियोमा भुपेन्द्र लिम्बु तुम्बाहाम्फे, एडम लिम्बु, फुर्वा चुक्टे शेर्पा, राजेश शाक्य (टोनीं) र कमानसिंह राईको छायांकन र एडम लिम्बुको सम्पादन छ ।
