काठमाडौ । आगामी फागुन २५ गतेलाई रिलिज मिति घोषणा गर्दै फिल्म ‘उपहार’को पहिलो गीत ‘वाह वाह वाह’ सार्वजनिक गरिएको छ । डान्सिङ नम्बरको यो गीतमा रेखा थापा र मुकुन भुषाल, पूजा शर्मा र समर्पण जंग कार्की तथा बेनिशा हमाल र तेज गिरीको नृत्य देख्न सकिन्छ ।
बाबुल गिरी र एलिना चौहानको स्वर रहेको गीतमा शंकर अधिकारी (घायल)को शब्द रचना तथा गायक गिरी स्वयंको संगीत छ । गीतमा कविराज गहतराजको कोरियोग्राफी रहेको छ ।
ज्ञानेन्द्र देउजाको निर्देशन रहेको फिल्ममा शिशिर राणा, सुष्मा कार्की, अन्शु महर्जन, आशा भुुषाललगायतको पनि अभिनय छ । रेखा फिल्मस् र कपनगढी फिल्मस्को ब्यानरमा निर्माण भएको फिल्मको कार्यकारी निर्मातामा रेखाका श्रीमान् बलराम शाही ठकुरी छन् । निर्मातामा भने सुलभ प्रतिक र समीक्षा देउजा रहेका छन् । फिल्मका अन्य तीन गीतमा अर्जुन पोखरेलको संगीत छ ।
विष्णु कल्पित घिमिरेको छायांकन, मित्र डि. गुरुङको सम्पादन, सुलक्षण भारतीको कथा, भारतीका साथै अभिमन्यू निरवी र माधव शर्माको पटकथा तथा संवाद रहेको फिल्ममा रोशन श्रेष्ठको द्वन्द्व निर्देशन छ ।
