काठमाडौं । नायक प्रदिप खड्कालाई फरक लुक्समा प्रस्तुत गरिएको फिल्म ‘रोज’ले पहिलो साता दुई करोड ७६ लाखको व्यापार गरेको छ । मुलुकका झण्डै साढे तीन दर्जन फिल्म हलमा दोस्रो सातामा प्रदर्शन भइरहेको फिल्मले पहिलो साता सोचे भन्दा राम्रो व्यापार गरेको वितरक गोविन्द शाही र मनोज राठीले बताएका छन् ।
वितरक शाहीका अनुसार शनिवार गोपिकृष्णको गोपी, गुण, अष्ट, बाराही, क्युएफएक्स सिभिज, एफक्युज केल टावर, कलंकी, बिएसआर बालाजुलगायतका हलमा दर्शक उपस्थिति उत्साहजनक छ । उनले फिल्म गत शुक्रबार, शनिबार र बुधबार (तीज)को दिन सबैजसो हलमा हाउसफूल भएको दाबी गरे ।
निरक पौडेलले निर्देशन गरेको फिल्ममा प्रदीप खड्का, परमिता राज्यलक्ष्मी राणा, मिरुना मगर, कर्मा शाक्य, बरुण शमशेर जबरा, नरेश पौड्याल, केदार भुषाल, पल्पसा डंगोल, प्रकाश श्रेष्ठ, प्रदीप दाहाललगायतको अभिनय छ ।
फिल्मको अर्को रोमान्टिक गीत ‘तिम्रो पछि पछि’पनि युट्युवबाट रिलिज गरिएको छ । यो गीतको भिडियोमा प्रदीप खड्का र पारमिताको रोमान्स देख्न सकिन्छ । दयाराम पाण्डेको शब्द, अर्जुन पाखरेलको संगीत रहेको यो गीतमा निशान भट्टराईको स्वर छ । गीतलाई गोविन्द राईले कोरियोग्राफी गरेका हुन् ।
