प्रेमलीला फष्टलुकमा फरक दीपशिखा

काठमाडौं । नायिका दिपशिखा खड्का र भारतीय मोडल अली खानको मुख्य भूमिका रहेको फिल्म ‘प्रेमलीला’को पोष्टर सार्वजनिक भएको छ । पोष्टरमा फिल्मका तीन मुख्य पात्र नायिका दिपशिखा खड्का र नायकद्वय अलि खान र मौसम खड्का अटाएका छन् । पोष्टरमा दीपशिखालाई भिन्न रुपमा प्रस्तुत गरिएको छ । यो फिल्ममा कपाल मुडुलो पारेका कारण पनि दीपशिखाको चर्चा राम्रो चलेको छ ।

अन्तर्देशीय प्रेम सम्बन्धको कथा प्रस्तुत गरिएको फिल्मको फस्र्ट लुक र पहिलो गीत ’जाने क्या हुवा ए’ यसअघि सार्वजनिक भइसकेको छ । फिल्ममा पबन गौतमको छायांकन, चन्दन दत्त र सालिक दुलालको सम्पादन, रामजी लामिछानेको कोरियोग्राफी रहेको छ । फिल्ममा महेश खड्का, नबिन कार्की र रबिराज शाहको संगीत, राजेश पायल राइ, शोभा पाण्डे र भारतीय गायक राजा हसनको स्वर रहेको छ ।

फिल्ममा दीपशिखा अलि र मौसमसँगै सुरज तमु, रेखा शाह, शर्मिला शर्मा, भारतीय कलाकारहरु अर्चना शुक्ला, ट्वीकंल श्रीवास्तव लगायतको अभिनय रहेको छ ।  नायिका खड्का कै कथा तथा लेखन रहेको फिल्मलाई नानीमैया कार्की र फैजिल फिल्म्सले संयुक्त रुपमा निर्माण गरेका हुन् । सुनिल मानन्धरले वितरण गर्न लागेको फिल्म माघ २५ बाट देशभर रिलिज हुनेछ ।