मुम्बई(एजेन्सी) । बलिउडमा एक्सन हिरोका रुपमा चिनिएका अभिनेता अजय देवगनलाई फिल्म उद्योगका ‘सिंघम’ पनि भनिन्छ । वर्तमान अवस्थामा उनले कमेडी, एक्शन र थ्रीलर फिल्ममा कमालको उपलब्धि पनि हासिल गरिसकेका छन् । अजय पछिल्लो पटक फिल्म ‘रेड’मा देखिएका थिए ।
अजयको आगामी दिनमा १० वटा फिल्म रिलिजको लाइनमा छन् । जुन फिल्मबाट दर्शकले भरपुर मनोरन्जन पाउनेछन् । उनी अभिनित फिल्म ‘टोटल धमाल’ पनि प्रदर्शनको सूचीमा छ । इन्दर कुमारले निर्देशन गरेको यो फिल्ममा अनिल कपूर र माधुरी दीक्षितको जोडी देखिँदैछन् । उनीहरुबाहेक अरशद वारसी र जावेद जाफरी पनि फिल्ममा हुनेछन् ।
अर्को फिल्म ‘दे दे प्यार दे’ एक रोमान्टिक कमेडी फिल्म हो । फिल्मको निर्देशन आकिव अली गरिरहेका छन् । अजयका साथ फिल्ममा तब्बू, जिम्मी शेरगिल र रकुलप्रीत सिंह देखिँदैछन् । त्यस्तै अजयको अर्को फिल्म ‘होगी ताना जी–द अनसङ वारियर’ हुनेछ । यो फिल्म एक मराठी वारियर तानाजीको संघर्षको कथामा आधारित हुनेछ । फिल्ममा अजय र सैफ अली खानको जोडी पनि देखिँदैछन् । यो भन्दा अघि यो जोडी सुपरहिट फिल्म ‘ओमकारा’ देखिएका थिए । यो फिल्ममा काजोल एक छोटो भूमिकामा हुनेछिन् ।
महागुरू चाणक्यको बायोपिक फिल्म ‘चाणक्य’मा पनि अजय शीर्ष भूमिकामा देखिनेछन् । फिल्मलाई ‘स्पेशल २६’ जस्ता फिल्म बनाउने निर्देशक नीरज पाण्डे निर्देशन गर्दैछन् ।अजय ९० को दशकदेखि हालसम्मै बलिउडमा छाइरहेका छन् । अजय सैय्यद अब्दुल रहीमको बायोपिक फिल्ममा पनि अभिनय गर्नेछन् । सैय्यद एक फूटबल कोच हुन् । अजय सन् २०१२ को सुपरहिट ‘सन अफ सरदार’को सिक्वेलमा पनि देखिँदैछन् ।
उनी यही महिनाको २८ तारिखमा रिलिज हुने फिल्म ‘सिम्बा’मा पनि विशेष भूमिकामा देखिँदैछन् । फिल्म ‘सिंघम’को अगाडिको कथा भनिएको फिल्ममा रणवीर सिंहको अभिनय छ ।
