काठमाडौं । स्वस्तिमा खड्कालाई टेम्पो ड्राईभरको रूपमा प्रस्तुत गरेको फिल्म ‘बुलबुल’को दोस्रो टिजर सार्वजनिक भएको छ । अघिल्लो टिजरमा ट्रिपमा जाने कि लाइसेन्स लिन जाने भन्ने दोधारमा परेकी स्वस्तिमा दोस्रो टिजरमा भने नवनायक मुकुन भुषाल अर्थात फिल्मका चोपेन्द्रसँग टेम्पो डेटिङमा छन् ।
स्वस्तिमासँग डेटिङमा जान पाएका चोपेन्द्र पनि निकै उत्साहित देखिन्छन् । स्वस्तिमालाई डेटिङमा कहाँ जाने भनेर चोपेन्द्रले सोध्दा स्वस्तिमाले कहाँ जान्छौ भनेर प्रतिप्रश्न गरेको गज्जब देखिएको छ ।
आगामी फागुन ३ गते भ्यालेन्टाइनको छेको पारेर प्रदर्शनमा आउने फिल्मको ‘खुद्राखाद्री मायाले’ बोलको गीत निकै रुचाइएको छ । फिल्ममा विनोद पौडेलको निर्देशन छ भने निर्मातामा अविरल थापा, कार्यकारी निर्मातामा रामराजा दाहाल छन् ।
सुसन प्रजापतिले खिचेको फिल्ममा बुद्धि तामाङ, दिपक क्षेत्री, लक्ष्मी बर्देवा, एलिना कार्की, जोयश पाण्डे, उज्जवल अधिकारी, सृष्टि भट्टराईआदिको अभिनय रहेको छ ।
